असन्तुष्टिका बीच अनमोलसँगै हङकङ पुगे अनुप

अनुपको ‘कृ’ निर्माण टिमसँग सम्बन्ध चिसिएको खबर बाहिर आइरहँदा उनी अनमोलसँगै फिल्मको प्रिमियरका लागि हङकङ पुग्नुले सबैलाई हैरान बनाएको छ । यसअघि केही मिडियासँग अन्तर्वार्ता दिने क्रममा अनुपले आफ्नो भागको केही सिन काटिएकोमा दुखेसो पोखेका थिए ।

‘एचकेदर्पण’ सँगको संक्षिप्त कुराकानीमा अनुपले हङकङबासी नेपालीसँग आफू अभिनीत फिल्म हेर्न इच्छुक रहेको बताएका छन् । यस्तै, भुवन र अनमोल पनि हङकङबासी नेपालीबाट ‘कृ’ को फिडब्याक लिन आतुर रहेको बताए । आइतवार साँझ हङकङको युनलोङ थिएटरमा फिल्मको प्रिमियर हुँदैछ ।

‘कृ’ मा अनमोल र अनुपसँगै अदिती बुढाथोकी, कामेश्वर चौरासिया, सरोज खनाल, लक्ष्मी गिरी, रुपा राना लगायतका कलाकारको पनि मुख्य भूमिका छ । फिल्मका निर्देशक सुरेन्द्र पौडेल हुन् ।

सुवास इन्टरटेन्मेन्टको ब्यानरमा तयार भएको फिल्मको प्रस्तुतकर्ता द सुपर काजोल फिल्मस् हो । फिल्ममा सुवास गिरी र भूवन केसीको लगानी छ । कमल गिरी कार्यकारी निर्माता रहेको फिल्मका सह–निर्माता श्री पराजुली हुन् ।