नायिका मलिना जोशीको चलचित्र यात्रामा लागिरहेको ‘ब्याडलक’ ‘गुडलक’मा बदलिने छाँटकाँट अझै देखिएको छैन । हिट चलचित्र खोजिरहेकी मलिनालार्इ कुनै पनि चलचित्रले राहत दिन सकेका छैनन् ।
चलचित्र ‘रानी’ बक्स अफिसमा पूर्ण रुपमा फ्लप भएपछि मलिनाको आशा ‘तिमी हुन्छौ जहाँ जहाँ’मा अडिएको थियो । हुनत, चलचित्रको प्रचार-प्रसारमा नै चुकेको यसको मेकर्सले सफलता हात पार्ने आशा राख्नु नै बेकार थियो ।
तर, पनि नायिका मलिना जोशीको उपस्थितीले चलचित्रले व्यापार राम्रै गर्ला भन्ने आशा यसको निर्माणपक्षलाई थियो । तर, शुक्रबारदेखि रिलिज भएको यो चलचित्रले बक्स अफिसमा पानी पनि भन्न पाएन ।
नयाँ नेपाली चलचित्र नहुँदा यसले त्यसको फाइदा लिन सक्थ्यो । तर, चलचित्र आएको र गएको नै दर्शकले थाहा पाएनन् । चलचित्रको एउटा गीत औषत चलेको थियो । यो चलचित्र पनि असफल भएपछि मलिनाले सफलताका लागि अझै मिहिनेत गर्नुपर्ने देखिन्छ । आफ्नो कारणले मात्र चलचित्र नचल्ने बताउँदै आएकी मलिना सफल चलचित्र दिन नसक्दा नयाँ फड्को मार्न सकेकी छैनन् ।
