धनकुटा / धनकुटामा सोमबार भएको सवारी दुर्घटनामा परी दुई जना गम्भीर घाइते भएका छन् ।
कोशी राजमार्गको धरान धनकुटा सडक खण्डमा पर्ने धनकुटा नगरपालिका वडा नं. ९ गुठीटार नजिक भएको दुर्घटनामा धनकुटा नगरपालिका वडा नं. ६ सिरान बजारका २३ वर्षका सुदीप जोशी र ५९ वर्षका भागवतबहादुर जोशी गम्भीर घाइते भएको प्रहरीले जनाएको छ ।
काठमाडौंबाट तेह्रथुम आउँदै गरेको ना. ७ ख १३४७ नम्बरको अग्नी यातायातले विपरीत दिशातर्फ गइरहेको २२ प ५५१ नम्बरको मोटरसाइकललाई ठक्कर दिँदा दुर्घटना भएको प्रहरीले बताएको छ । ठक्कर दिने बस र चालकलाई मूलघाट प्रहरी चौकीले नियन्त्रणमा लिएको छ ।
घाइते मध्ये भागवतको विराटनगरको न्यूरो अस्पतालमा र सुदीपको धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको धनकुटा प्रहरी प्रमुख एसपी सुरेन्द्रबहादुर गुरुङले जानकारी दिए ।
