धरान । फिल्म ‘जात्रै जात्रा’ आउँदो जेठ ३ गतेबाट प्रदर्शनमा आउँदै छ । २०७५ को फागुनमै रिलिज हुने भनिएको यो फिल्म यसका मुख्य कलाकार विपिन कार्की दुर्घटनामा परेपछि पछि सरेको थियो ।
फिल्ममा शीर्ष भूमिका निभाएका अभिनेता विपिन कार्की यो फिल्म अघिल्लो फिल्म ‘जात्रा’ भन्दा पनि रमाइलो रहेको बताउँछन् ।
‘यो फिल्म ‘जात्रा’ भन्दा पनि रमाइलो हुनेछ, अझै छिटो फिल्म सकिएजस्तो लाग्नेछ, दर्शकलाई अझै रमाइलो लाग्नेछ’ विपिनले भने, ‘जात्रा हेर्नेले त यो फिल्म हेर्नैपर्ने नै भयो, नहर्नेले पनि फिल्म हेर्नुपर्ने गरी हामीले बनाएका छौँ ।’
फिल्म ‘जात्रा’ को तुलनामा ‘जात्रै जात्रा’ अझै कमेडी भएको निर्माण टिम बताउँछ । यो फिल्मलाई प्रदीप भट्टराईले निर्देशन गरेका हुन् । फिल्ममा विपिन कार्की, रविन्द्र झा, दयाहाङ राई, रविन्द्रसिंह बानियाँ, वर्षा राउतलगायतका कलाकारको शीर्ष भूमिका छ ।
