चल्तीकी अभिनेत्री स्वस्तिमा खड्का अचेल प्याच्च बोल्ने बानीले विवादमा पर्ने गरेकी छन् । कुनै पनि घटनामा छिटो प्रतिक्रिया दिने उनलाई अहिले बोल्यो कि पोल्योको अवस्था छ ।
केही वर्षअघि फिल्म ‘छक्का पञ्जा’ मा महिलालाई पिट्ने कुरा गरेको भन्दै ऋचा शर्माले आफूलाई अचम्म लागेको प्रतिक्रिया दिएपछि त्यसको जवाफमा छक्का पञ्चा टिम नै खन्निएर स्टाटस लेखेको थियो । त्यसमा स्वस्तिमा पनि थिइन् । त्यसबेला पनि उनी विवादमा तानिएकी थिइन् ।
उनले हालै फिल्म ‘हजार जुनीसम्म’ को कार्यक्रममा २० लाख लिने कलाकारले ५० लाख उठाउन सक्नुपर्ने, नत्र निर्माताले ५ लाख पनि नपाउँदा मज्जा नआउने भन्दै बोलेपछि उनी फेरि विवादमा परेकी छन् ।
केही दिनअघि अभिनेत्री पूजा शर्माले एक फिल्मका लागि २० लाख पारिश्रमिक लिएको चर्चा भएको
थियो । स्वस्तिमाका अभिव्यक्तिलाई लिएर अहिले नाम चलेका अभिनेत्रीहरूसमेत असन्तुष्ट बनेका छन् ।
