भदौ ६ गतेबाट रिलिज हुन लागेको फिल्म ‘जाइरा’ मा समावेश आइटम गीत सार्वजनिक भएको छ । ‘यो मात चढेको साँझ’ बोलको आइटम गीतमा मीना निरौलाको स्वर छ । भिडियोमा तनुजा गुरुङले नृत्य गरेकी छन् । गोविन्द राईको कोरियोग्राफी रहेको भिडियोमा प्रमोद अग्रहरि र सिर्जना रेग्मीको पनि अभिनय रहेको छ ।
सन् १९७४ मा रिलिज भएको फिल्म ‘मनको बाँध’ मा समावेश गीतलाई रिमेक गरेर यो फिल्ममा राखिएको छ । ‘मनको बाँध’ मा समावेश गीतमा भने मीरा राणाले स्वर दिएकी छन् । गीतमा किरण खरेलले शब्द तथा शिव शङ्करको सङ्गीत छ । ‘जाइरा’ का लागि रिमेक गरिएको गीतमा फिरोज बज्राचार्य र डिजे राजुले रिएरेञ्ज गरेका छन् ।
‘जाइरा’मा नायिका नम्रता श्रेष्ठको मुख्य भूमिका छ । फिल्ममा उनलाई मार्सल आर्ट खेलाडीको भूमिकामा प्रस्तुत गरिएको छ । फिल्ममा अनुपविक्रम शाही, रेमनदास श्रेष्ठ, सुजता श्रेष्ठ र सम्राट मगरको पनि मुख्य भूमिका छ ।
आशुतोषराज श्रेष्ठले निर्देशन गरेको फिल्ममा निर्देशक श्रेष्ठ र निरोज महर्जनको लेखन छ । ‘कटामरी फिल्म्स’ को ब्यानरमा निर्माण भएको यो फिल्म ‘नम्रता श्रेष्ठ प्रोडक्सन’ र ‘ट्रेण्डसेटर्स प्रालि’ को ब्यानरमा प्रस्तुत भएको हो । प्रसन्न गोपाली कार्यकारी निर्माता रहेको फिल्मलाई बाबु श्रेष्ठले छायाङ्कन तथा लोकेश बज्राचार्यले सम्पादन गरेका हुन् ।
