कोरोना संक्रमणको दोस्रो लहर देशविदेशमा भयावह रुपमा देखिइरहेका बेला सुनसरीको धार्मिक, पर्यटकीय क्षेत्र वराहक्षेत्र नगरपालिकाले हेल्थ डेस्क सञ्चालन गर्ने, आइसोलेसन निर्माण गर्ने हाटबजार र धार्मिक क्षेत्रमा नियमन गर्ने निर्णय गरेको छ ।
नगरको विपद् व्यवस्थापन समितिको बुधबार बसेको बैठकले वराहक्षेत्र नगरपालिकाभित्र विभिन्न स्थानमा लाग्ने हाटबजार ०७८ वैशाखभरी बन्द गर्ने निर्णय गरेको छ ।
कोभिड १९ को संक्रमणलाई मध्यनजर गर्दै आइसोलसन सञ्चालन गर्नका लागि छिमेकी नगरपालिका रामधुनीसँग सहकार्य गर्ने निर्णय गरिएको छ । वराहक्षेत्र १ चतरामा अवस्थित पुरानो होल्डिङ सेन्टरसमेत सञ्चालित रामानन्दाचार्य सेवा पीठको भवनलाई आइसोलेसन सेन्टरका रुपमा निर्माण गर्ने निर्णय गरिएको छ ।
यस्तै वराहक्षेत्र नगरपालिकाको विभिन्न नाकाहरुमा बाहिरबाट आउने, व्यक्तिहरुको स्वास्थ्य जाँच र गन्तव्यको रेकर्ड राख्ने निर्णय भएको छ । स्वास्थ्य शाखा प्रमुख सुलोचना चौधरीका अनुसार वराहक्षेत्र नगरपालिकाको नाकाहरु कोशी पुल, मधुवन, शिकारी थान, सुनसरी पुल र पिंडारीमा हेल्थ डेस्क सञ्चालन गर्ने निर्णय गरिएको छ ।
वराहक्षेत्रमा सञ्चालन हुने सार्वजनिक यातायातका साधनमा यात्रा गर्दा यात्रुले अनिवार्य रुपमा मास्क लगाउने, सेनिटाइजर प्रयोग गर्ने, सिट क्षमताभन्दा बढी यात्रु राख्न नदिने निर्णय गरिएको छ ।
यस्तै वराहक्षेत्र नगरपालिकाभित्रका विभिन्न धार्मिक स्थल र धार्मिक कार्यक्रममा अन्यत्रबाट आउने भक्तजनलाई रोक लगाउने र स्वास्थ्य सावधानीका उपाय अवलम्वन गर्ने निर्णय गरिएको छ ।
यस्तै वराहक्षेत्र नगरपालिकामा सञ्चालित विद्यालयहरुले परीक्षा लिइरहेको पाइएकाले विद्यालयको परीक्षा स्थगन गर्ने समेत निर्णय गरिएको नगर प्रमुख निलम खनालले जानकारी दिए ।
