सङ्क्रमणका बेला निःशुल्क सेवा दिने चतराका यातायात व्यवसायीकाे उद्घोष

जनप्रतिनिधिले जनताको करले किनेको सरकारी गाडी कोभिड सङ्क्रमणको अवस्थामा सङ्क्रमितको सेवाका लागि एम्बुलेन्सका रुपमा प्रयोग गर्ने निर्णय गरे । 

उनीहरुको निर्णयलाई सञ्चारमाध्यमले प्रशंसित बनाए । नागरिक स्तरबाट जनप्रतिनिधिहरुको सह्राना पनि भयो । जनप्रतिनिधि मनकारी देखिए । 

तर आफ्नै निजी सम्पत्ति आफैंले किनेका सवारी साधन निषेधाज्ञाका कारण घरमा थन्किएपछि वराहक्षेत्रका मनकारी नागरिक किशोर ताम्राकारले आफूसँग भएका सबै यातायातका साधन नागरिक सेवामा लगाउने उद्घोष गरेका छन् । 

वराहक्षेत्र १ चतराका यातायात व्यवसायी किशोर ताम्राकारले सङ्क्रमणको अवस्थामा नगरमा कसैलाई यातायातको साधन चाहिएमा निःशुल्क सेवा गर्न तयार रहेको बताएका छन् । 

उनले सामाजिक सञ्जालमार्फत् आफूसँग रहेको को १ ख २५७७ नम्बरको बस र घरमा रहेका ३ वटा मोटरसाइकललाई प्रयोग गर्न सक्ने बताएका छन् । 

यो महामारीको समयमा मानव सेवाका लागि सबै प्रकारका सहयोग गर्न आफू तयार रहेको यातायात व्यावसायी ताम्राकारले बताए । 

अघिल्लो चरणको कोरोना सङ्क्रमणको अवस्थामा पनि चतरामा सञ्चालनमा आएको आइसोलेसन र होल्डिङ सेन्टरमा उनले श्रमदानसहितको सेवा गरेका थिए । 

अहिले पनि मानव सेवाका लागि आफू तयार रहेको बताउँदै उनले सहयोग लिनका लागि आफ्नो मोबाइल नम्बर ९८४२०५८४२६ मा सम्पर्क गर्न अनुरोध गरेका छन् ।