धरान/ युवापुस्तामाझ चर्चित ब्याण्ड रविन एन्ड द न्यू रेभुलेसनले आगामी पुस ३ गते शनिबार धरानमा आयोजना हुने ‘टुबोर्ग मेगा लाइभ कन्सर्ट’ मा साङ्गीतिक प्रस्तुति दिने भएको छ ।
रविन एन्ड द न्यू रेभुलेसन ब्याण्डका मुख्य गायक रविन तामाङ अहिले ‘रियालिटी शो ब्याण्ड च्याम्पियन नेपाल’ को सुटिङमा व्यस्त छन् ।
विभिन्न नेपाली चलचित्रमा अभिनयसमेत गरेका तामाङको केटा–केटी, दम मरो दम, चिसो चिसो हावामा, आधुनिक आँगनमा, म मौनतामा, भेटे मैले शिवजी, जति माया लाए पनि लगायतका गीतहरू चर्चित छन् ।
चार वर्षअघि न्यू एयर इभ कन्सर्टमा धरान आएका गायक रविन तामाङ धराने दर्शकहरूको माया हरेक पटकको कन्सर्टमा सधैँ बढिरहेको पाएको बताउँदै भन्छन्, ‘लामो समयपछि मेगा कन्सर्ट त्यो पनि धरानमा आउन पाउँदा एकदमै खुसी छु ।’
टुबोर्गको प्रस्तुति तथा सिल्भर इन्टरटेनमेन्टको आयोजनामा धरानको पब्लिक हाईस्कुलको मैदानमा आयोजना हुनलागेको कन्सर्टमा रविन एन्ड द न्यू रेभुलेसनसँगै धरानका दुई स्थानीय प्रतिभाहरू हिना मल्ल बराइली र दीपिका बस्नेतको समेत प्रस्तुति रहने आयोजकले जनाएको छ ।
हिना नेपाल आइडलको टप टेनमा पुगेर चर्चामा आएकी गायिका हुन् भने दीपिका बस्नेत पनि नेपाल स्टारकी प्रतियोगी हुन् । कोभिडको कारणले दुई वर्षदेखि कुनै पनि ठूला कन्सर्ट नभएको धरानमा यो पहिलो कन्सर्ट हो । कार्यक्रमस्थलमा प्रवेशको लागि मास्क र सेनिटाइजर अनिवार्य गरिएको छ ।
टुबोर्गको प्रस्तुति र सिल्भर इन्टरटेनमेन्टको आयोजनामा यसअघि धरानमा टुबोर्ग मेगा लाइभ कन्सर्ट २०१७, धरान र पथरीमा टुबोर्ग मेगा लाइभ कन्सर्ट २०१८ आयोजना भइसकेको छ ।
