विजयपुर । भ्यालेन्टाइन डेको अवसर पारेर गजलकार चन्द्र प्रसाईं ‘परिष्कृत’ को नयाँ रोमान्टिक गीत ‘माया गर्न मन छ’ सार्वजनिक भएको छ ।
प्रविन बेडवालको स्वर रहेको गीत ‘माया गर्न मन छ’ मा अर्जुन पोखरेलले सङ्गीत दिएका छन् । गीतमा सङ्गीत संयोजन फणिन्द्र राईले गरेका छन् । गीतमा प्रेमीले प्रेमिकालाई माया गर्न मन भएकोले आफ्नो अँगालोमा आउन आग्रह गरेका छन् ।
रोमान्टिक प्रेमकथा देखाउन खोजिएको गीतमा अभिनेता पुष्प खड्का र अभिनेत्री शिल्पा पोखरेलले अभिनय गरेका छन् । देवेन्द्र पाण्डेद्वारा निर्देशित भिडियोको निर्माता तेजी प्रसाईं रहेका छन् ।
भिडियोको छायाङ्कन हरि हुमागाईंले गरेका हुन् भने सम्पादन विकास दाहालले गरेका हुन् । गीतकार प्रसाईंको युट्युब च्यानल प्रसाइसन इन्टरटेन्मेन्टबाट सार्वजनिक गरिएको हो ।
एक दशक अगाडिदेखि गीत लेखन गर्दै आएका गीतकार परिष्कृतका शब्दमा थुप्रै गीत बजारमा आएका छन् भने धेरैले चर्चासमेत कमाएका छन् ।
