लोक गायक तथा कलाकार जयनन्द लामाको निधन भएको छ । बुधबार बिहान भक्तपुरको कौशलटारमा रहेको आफ्नै निवासमा उनको निधन भएको हो ।
सिन्धुपाल्चोकको बाह्रबिसेमा जन्मिएका लामाले थुप्रै मौलिक लोकगीत गाउनुका साथै चलचित्र र टेलिश्रृंखलामा अभिनयसमेत गरेका छन् ।
यस्तै, उनका कलकत्ते काइँयो, मुलाको चाना, चुइचुइचुइकने जुत्तालगायतका गीत लोकप्रिय छन् । चलचित्र मनको बाँध, छक्कापञ्जा लगायत चलचित्रहरुमा पनि अभिनय गरेका थिए । पछिल्लो समय हाँस्य टेलीश्रृंखला हल्का रमाइलोमा उनले अभिनय गर्दै आएका थिए ।
उनको निधनले नेपाली सांगीतिक क्षेत्रमा ठूलो क्षति पुगेको छ । सामाजिक सञ्जालमा कलाकार एवं उनका शुभचिन्तक तथा प्रशंसकहरुले उनीप्रति श्रद्धाञ्जली व्यक्त गरेका छन् ।
