धरान । समसामयिक विषयमा तयार गरिएको ‘हिजो आजका कुरा’ प्रदर्शन हुने भएको छ ।
कुनै समय निकै चर्चित हास्य प्रधान टेलिशृङ्खलाबाटै नाम जुराइएको सामाजिक कथानक चलचित्र ‘हिजो आजका कुरा’ को प्रदर्शन मिति तय गरिएको हो ।
फिल्म अभिनेता सन्तोष पन्तले निर्माण गरेका हुन् । निर्देशक साकार पन्तका अनुसार आउँदो असोज २८ गतेबाट दर्शकमाझ आउने जनाइएको छ । यसअघि २०७७ वैशाख १२ गतेलाई प्रदर्शनको मिति तय गरिए पनि कोरोना महामारीका कारण स्थगित भएको थियो ।
कोरोना महामारीले नेपाली फिल्म उद्योग धरासायी बनेको छ । यसबीचमा फिल्मभन्दा पनि वृत्तचित्र र लघु फिल्महरू निर्माण गरिएका छन् ।
अनलाइनमाध्यमबाटै यस्ता फिल्मको प्रचार–प्रसार गर्न सकिने भएकाले पनि लघु चलचित्र र वृत्तचित्रप्रति निर्माता, निर्देशकको ध्यान आकृष्ट भएको थियो । फिल्ममा सन्तोष पन्त, साकार पन्त, रमा थपलिया, केकी अधिकारी, ऋचा शर्मा, दिव्यदेव पन्त, रीमा विश्वकर्मालगायतका कलाकार छन् ।
फिल्मको कथा सन्तोष पन्तले लेखेका हुन् भने पटकथा सन्दीप किस्नाको छ । चलचित्रको ‘माया जदौ’ बोलको गीत अहिले चर्चामा छ ।
