विराटनगर । विराटनगरस्थित नोबेल मेडिकल कलेजले स्वास्थ्य बिमा कार्यक्रम स्थगन गरेको जनाएको छ ।
बिमा सेवा दिएबापत साउन १ गतेसम्म ५५ करोड रुपैयाँभन्दा बढी भुक्तानी नपाएको भन्दै अस्पताल प्रशासनले साउन १ गते राति १२ बजेबाट लागू हुने गरी कार्यक्रम अनिश्चितकालका लागि स्थगित गर्ने भएको हो ।
अस्पतालका प्रबन्धक नारायण दाहालले स्वास्थ्य बिमा बोर्डलाई पटक पटक रकम निकासाका लागि अनुरोध गर्दा पनि चासो नदेखाएपछि स्वास्थ्य बिमामार्फत्को सेवा नै ठप्प पार्ने निर्णयमा पुगेको बताए । यहाँ दैनिक ओपीडीमा १ हजार ९ सय बिरामीले सेवा लिने गरेका छन् । त्यसमध्ये दैनिक ६० प्रतिशतभन्दा बढी बिरामी स्वास्थ्य बिमाबाट आउने गरेका प्रबन्धक दाहालले बताए ।
सरकारले ०७२ चैत २५ देखि कैलालीबाट सुरु गरेको स्वास्थ्य बिमा कार्यक्रम ७७ वटै जिल्लामा लागू भइसकेको छ । प्रतिपरिवार (५ जनासम्म) ३ हजार ५ सय रकम तिरेको आधारमा वार्षिक एक लाखसम्मको स्वास्थ्य सुविधा र थप प्रतिसदस्य ७ सयका दरले रकम थपिएमा प्रतिसदस्य २० हजार बराबरको सेवा थपिने प्रावधान छ । अधिकतम् सेवासुविधाको सीमा २ लाख (१० जनाको परिवार सदस्य) सम्म रहेको छ । यो आर्थिक वर्ष स्वास्थ्य बिमाका लागि ७ अर्ब ५० करोड रुपैयाँ विनियोजन गरिएको छ ।
स्वास्थ्य बिमा कार्यक्रमको नियमन, अनुगमन, प्रचार–प्रसार, दाबी भुक्तानीको रुजुलगायत काम स्वास्थ्य बिमा बोर्डको हो । बोर्डका अनुसार हाल मुलुकभर ४ सय ४० वटा स्वास्थ्य संस्थाले बिमा कार्यक्रम लागू गरेका छन् । तर, अस्पताल व्यवस्थापनले कहिले समयमा रकम नपाएको भन्दै सेवा ठप्प पार्दा त कहिले फार्मेसीमा औषधि उपलब्ध नहुँदा बिमितहरू मर्कामा पर्दै आइरहेका छन् ।
जेठ १५ मा तत्कालीन अर्थमन्त्री जनार्दन शर्माले स्वास्थ्य बिमा निजी कम्पनीमार्फत् सञ्चालन गर्न आवश्यक तयारी थालिने बजेटमा उल्लेख गरेका थिए । पछिल्लो समय आफ्नो योगदानअनुसारको सुलभ र प्रभावकारी सेवा पाउन नसक्दा कार्यक्रममा आकर्षण खस्कँदै गएको देखिन्छ ।
प्रत्येक वर्ष बिमितको नवीकरण सङ्ख्या घट्दै गएको भने नयाँ बिमितको सङ्ख्या उल्लेखनीय मात्रामा बढ्न सकेको छैन । बोर्डका अनुसार चालु आ.व.को वैशाखसम्म ५५ लाख ६४ हजार ७ सय ५९ बिमित रहेकामा ५६.३१ प्रतिशत अर्थात् ३१ लाख ३३ हजार ९ सय ८३ जनाले मात्र नवीकरण गरे ।
त्यस्तै, ०७६/७७ मा १३ लाख १८ हजार ५ सय ८४ जनाले नवीकरण गरे भने ९ लाख २१ हजार ५ सय ५३ जना मात्र नयाँ बिमित थपिए । ०७७/७८ मा २२ लाख २९ हजार ७ सय २२ जनाले नवीकरण गरेकामा नयाँ बिमित १४ लाख ३० हजार ६ सय ९३ जना थप भएका थिए ।
