धरान । मिस युनिभर्स नेपाल २०२२ को फाइनलमा पुगेकी चिकित्सक आयुष्नोभा ढुङ्गानालाई क्रिटिक्स अवार्ड वितरण गरिएको छ । यो अवार्ड चलचित्र क्षेत्रबाट दिने गरिन्छ ।
फाइनल राउन्डमा रहेकी आयुष्नोभा चलचित्र क्षेत्रमा पनि आबद्ध छिन् । दुई वर्षअघि सार्वजनिक भएको फिल्म ‘डाक्टर खाते’ बाट उनले स्क्रिप्ट सव–टाइटलतर्फ क्रिटिक्स अवार्ड पाएकी हुन् । काठमाडौंमा सम्पन्न दोस्रो नेशनल इन्टरटेनमेन्ट अवार्ड २०२२ बाट उनले उक्त टाइटल जितेकी हुन् ।
कार्यक्रममा नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले अवार्ड वितरण गरे । तर, उनी कार्यक्रममा सहभागी नभएका कारण उनको आमा रोशनी केसीले ग्रहण गरेकी थिइन् । उनी यतिबेला मिस युनिभर्सको क्लोज क्याम्पमा छिन् । उनी बङ्गलादेशबाट छाला रोगसम्बन्धी अध्ययन गरेर नेपाल फर्किएकी हुन् ।
मिस युनिभर्स नेपालको फाइनल भदौ ९ गते हुँदै छ । विजेताले नेपालको प्रतिनिधित्व गर्दै ७१ औं मिस युनिभर्स २०२२ मा सहभागी हुन पाउने जनाइएको छ ।
