बिर्तामोड । साहित्य चौतारी झापाले दक्षिणारहित सडक देउसी खेल्ने भएको छ ।
चौतारीका अध्यक्ष हस्त परियारको अध्यक्षता र संरक्षक देवीभक्त श्रेष्ठको प्रमुख आतिथ्यमा बसेको बैठकले अघिल्ला वर्षमा जस्तै सडक देउसीलाई निरन्तरता दिने निर्णय गरेको हो ।
संरक्षक श्रेष्ठले कात्तिक ९ गते गोवर्धन पूजाका दिन बिहान ११ बजेदेखि बिर्तामोडको दुर्गा मन्दिरपरिसरमा सडक देउसी प्रतियोगिता आयोजना गरिने बताए । देउसीपछि चौतारीको सभाहल होटल हिकोला हेरिटेजमा प्रतियोगितात्मक मासिक साङ्गीतिक काव्यसभा आयोजना गरिएको छ ।
साहित्य चौतारीकी पूर्व उपाध्यक्ष, यसअघि सम्मानित व्यक्तित्व साहित्यकार लीला अनमोलको प्रमुख आतिथ्यमा चौतारीले देउसी भैलो तथा मासिक साङ्गीतिक काव्यसभा आयोजना गर्न लागेको हो । यसपटक साहित्य चौतारीका सह–सचिव देवीचरण भण्डारीको देउसी विशेष प्रस्तुति रहनेछ ।
बैठकले तिहार विशेष कार्यक्रमको संयोजक सुनिता तामाङलाई तोकेको छ । तामाङ मासिक काव्यसभा संयोजकसमेत हुन् । बैठकले प्रतियोगितात्मक कार्यक्रमको निर्णायकमा साहित्यतर्फ दिलिप घिमिरे, सङ्गीततर्फ गायक विजय दङ्गाल र कलातर्फ छमछमी विजेता अनुजा अग्रवाललाई राख्ने निर्णय गरेको छ ।
यसैबीच साहित्य चौतारीले झापाका विद्यालय तथा झापा बाहिरका विद्यालयमा पनि मासिक साङ्गीतिक काव्यसभा आयोजना गर्ने निर्णय गरेको छ । संरक्षक देवीभक्त श्रेष्ठले बालप्रतिभाको विकासका लागि चौतारीले झापा र त्यसभन्दा बाहिरका जिल्लामा पनि साहित्यिक अभियान चलाउन लागिएको जानकारी दिए ।
विद्यालय तहमा मासिक साङ्गीतिक काव्यसभा आयोजना गर्न साहित्यकार भानुभक्त कुभिण्डेलीको संयोजकत्वमा पाँच सदस्यीय समिति गठन गरिएको छ । समितिको व्यवस्थापनमा कार्यक्रम आयोजना गर्ने चौतारीको तयारी छ ।
समितिको सह–संयोजकमा साहित्यकार लीला अनमोल छिन् । सदस्यमा अनिरुद्र ओली, दुर्गाप्रसाद सिग्देल र सुनिता तामाङ रहेका छन् । यसअघि साहित्य चौतारीको आयोजनामा भोजपुरका केही विद्यालयमा साहित्यिक अभियान सञ्चालन भएको थियो ।
