विराटनगर । सातौं संस्करणको विराट एक्स्पो आज (बिहीबार) बाट सुरु हुँदैछ । आज मङ्सिर २९ देखि पुस ६ गतेसम्म विराटनगर महानगरपालिका–१४ स्थित डिग्री क्याम्पस (पुरानो हवाई फिल्ड)मा सुरु हुन लागेको हो ।
एक्स्पोको उद्घाटन राष्ट्रपति विद्यादेवी भण्डारीले बिहीबार दिउँसो २ बजे गर्ने भएकी छन् । उद्योग सङ्गठन मोरङको आयोजनामा हप्तादिनसम्म सञ्चालन हुने एक्स्पोमा ३ सय ६१ वटा स्टल रहने भएको छ ।
एक्स्पो अवधिभर माउन्टेन फ्लाइटको व्यवस्था पनि गरिएको छ । फ्लाइटबाट ताप्लेजुङको पाथीभरा दर्शन पनि गराइने उद्योग सङ्गठन मोरङका अध्यक्ष सुयश प्याकुरेलले जानकारी दिए ।
यसबाहेक पर्यटकीय गन्तव्यको जानकारी, स्थानीय खाना उत्सव, दैनिक साङ्गीतिक कार्यक्रम हुनेछ । एक्स्पोमा रोजगार दाता र रोजगारको खोजीमा रहेकाहरूबीच प्रत्यक्ष भेटघाटका लागि छुट्टै पेभिलियन रहेको छ ।
