धरानकी गायिका तर्जुना मगरको नयाँ गीत ‘यात्रा’ सार्वजनिक भएको छ ।
तर्जुनाकै शब्द र स्वर रहेको गीत ‘यात्रा’को संगीत वरिष्ठ संगीतकार दिनेश सुब्बाले गरेका हुन् । हङकङमा एक कार्यक्रममा बीच यात्राको भिडिओ सार्वजनिक गरिएको छ । ब्लु ओसन रेष्टुरेन्टमा आयोजीत कार्यक्रममा प्रमुख अतिथि हङकङ नेपाली महासंघकी अध्यक्ष रिता गुरुङ तथा विशेष अतिथिहरु गायक राज तामाङ, समाजसेवी टंक राना लगायतको उपस्थितिमा भिडिओ सार्वजनिक भएको हो ।
भिडिओमा योगा बराईली, समिर मगर तथा बालकलाकारहरु सोनिङ लिम्बु, सविना मगर र नियाँ मगरले अभिनय गरेका छन् । पर्वत घलेले छायाँकन गरेको भिडिओ ज्याप स्टुडियोले तयार पारेको हो ।
अध्यात्ममा रुचि राख्ने तर्जुनाको यो गीत जीवन दर्शनमा आधारित छ ।
धरान-१५ की तर्जुनाले यसअघि पनि गीतहरु रेकर्ड गराएकी थिईन् । धरानमा युरेका स्कुलमा अध्ययन गर्ने क्रममै गाउन थालेकी उनले यहिं रहँदा पनि एउटा गीत रेकर्ड गराएकी थिईन् । हङकङ पुगेपछि वरिष्ठ संगीतकार दिनेश सुब्बासँग संगीत प्रशिक्षण समेत लिएकी उनले व्यस्त दैनिकी बीच फुसर्द निकालेर गायनको अभ्यास गर्ने गरेकी छन् । समाजसेवा समेत गर्दै आएकी उनले ‘ट्रष्ट सोल’ नामको युट्युब च्यानल समेत सञ्चालन गरिरहेकी छन् । सोहि च्यानलबाट उनको गीतको भिडिओ सार्वजनिक भएको हो । उनी भन्छिन्, ‘यो च्यानललाई सामाजिक कार्यमा पनि प्रयोग गर्ने लक्ष्य छ ।’
फोटो : जगत अम्बु गुरुङ
यात्रा गीतको भिडिओ :
