ताप्लेजुङ । ताप्लेजुङको फक्ताङ्लुङ गाउँपालिका–६ लेलेपमा झण्डै एक महिनादेखि बेपत्ता भएकी छ वर्षीया बालिका मृत अवस्थामा भेटिएकी छन् ।
स्थानीय गणेश लिम्बूकी छोरी सोनिया लिम्बू मृत अवस्थामा फेला परेको जिल्ला प्रहरी कार्यालय ताप्लेजुङले जनाएको छ । सोनिया गत माघ २५ देखि बेपत्ता थिइन् । घरदेखि करिब आधा घण्टाको पैदल दूरीमा पर्ने आयुजिम्बा खोला किनारमा उनको शव फेला परेको ताप्लेजुङका प्रहरी प्रमुख डिएसपी राजन लिम्बूले जानकारी दिए ।
उनका अनुसार सुँगुरलाई चारो खोज्न गएका स्थानीयले बालिकाको शव भेटेपछि प्रहरीलाई खबर गरेका थिए । बालिकाको शव पोष्टमार्टमका लागि सदरमुकाम ल्याइएको छ । शव भेटिएको खबरपछि जिल्ला प्रहरी कार्यालयबाट प्रहरी टोली घटनास्थलमा गएको थियो ।
घटनास्थल सदरमुकाम फुङ्लिङदेखि झण्डै एक दिनको पैदल दूरीमा पर्छ । घटनाका सम्बन्धमा अनुसन्धान भइरहेको प्रहरीले जनाएको छ ।
