धरान । अभिनेत्री पूजा शर्माको अनमोल केसीसँग फिल्म खेल्ने चाहना फेरि पनि पूरा नहुने देखिएको छ ।
गत असार १९ गते नयाँ फिल्मका लागि सम्झौता गरिए पनि हाल उक्त फिल्मबाट अनमोल केसीले हात झिकेको हल्ला गाइँगुइँ चल्न थालेको छ । पूजाको निर्माण र सुदर्शन थापाको निर्देशनमा फिल्म निर्माण हुन लागेको थियो ।
उक्त फिल्ममा अनमोल केसीसँग सम्झौता गरिएको थियो । अनमोलको पूजासँग जोडी बाँधिने बताइएको भए पनि अनमोलले फिल्मबाट हात झिकेको हल्लासँगै पूजाको चाहना अधुरै हुने देखिएको हो ।
अनमोलले फिल्म हस्ताक्षर गर्दा लिएको रकम पनि फिर्ता गरिसकेको जनाइएको छ । फिल्मी स्रोतका अनुसार गत फागुनमा प्रदर्शनमा आएको छड्के २ मा उनको चरित्रलाई दर्शकले नरुचाएपछि अनमोल तत्काल फरक चरित्रमा देखा नपर्ने सोचमा रहेको बताइन्छ ।
नयाँ फिल्ममा अनमोल र पूजालाई फरक चरित्रमा देखाइन लागिएको थियो । यता फिल्म निर्देशक थापाले अनमोलले फिल्म नछाडेको दाबी गरेका छन् । यस विषयमा अनमोलले हालसम्म कुनै प्रतिक्रिया दिएका छैनन् ।
