धरान । सामाजिक सञ्जालमार्फत् नक्कली पेस्तोल राखेर तस्बिर सार्वजनिक गर्ने दुईजनालाई प्रहरीले पक्राउ गरेको छ । पक्राउ पर्नेमध्ये एकजना माध्यमिक शिक्षा परीक्षा (एसईई) दिने पनि छन् । उनीहरूलाई सुनसरी प्रहरीले हरिनगर गाउँपालिकाबाट बुधबार पक्राउ गरेको जनाएको छ ।
सुनसरी हरिनगर–१ का अमरकुमार गुप्ताले केही दिनअघि इटालियन पेस्तोलजस्तो देखिने हतियारसहितको आफ्नो फोटो सामाजिक सञ्जालमा हालेका थिए । सोही आधारमा सुनसरी प्रहरीले गुप्तालाई पक्राउ गरेको सुनसरी प्रहरीका प्रवक्ता डिएसपी राजकुमार राईले जानकारी दिए । त्यस्तै सोही गाउँपालिका–२ का रोशन साहलाई समेत पक्राउ गरिएको छ ।
दुवैलाई हिरासतमा राखी अनुसन्धान भइरहेको प्रवक्ता राईले जानकारी दिए । उनीहरूले सामाजिक सञ्जालमा पोष्ट गरेको पेस्तोल नक्कली रहेको प्रहरीले जनाएको छ । तर, पनि हतियार देखाई धाकधम्की दिएको घटना भए–नभएको विषयमा अनुसन्धान भइरहेको प्रवक्ता राईले जानकारी दिए ।
