भरौल । कवि प्रकाश दिप्साली राईको ‘त्यो तिम्रो मन’ बोलको गीत सार्वजनिक भएको छ । गीतमा गायक स्वरूपराज आचार्यको स्वर रहेको छ ।
गीत बिहीबार एक कार्यक्रमका बीच वराहक्षेत्र नगरपालिका–३ नम्बर वडामा सार्वजनिक गरिएको हो । स्वर्णिम साहित्य समाजको आयोजनामा ३ नम्बर वडाध्यक्ष राजदीप लामाले बटन थिची सार्वजनिक गरेका हुन् । गीतलाई सोही समयमा गायक तथा सङ्गीतकार रामबाबु राईको अफिसियल युट्युब च्यानलबाट पनि सार्वजनिक गरिएको छ । गीतमा रामबाबु राईले नै सङ्गीत भरेका छन् । सार्वजनिक कार्यक्रममा भावुक देखिएका गीतकार दिप्सालीले सपना देख्दै जाँदा पूरा हुँदै जाने बताए । उनले आफू काममा मात्रै विश्वास गर्ने भएकाले सफलता र असफलताले आफूलाई आजका दिनसम्म फरक नपारेको बताए ।
कार्यक्रममा रचना वाचन पनि गरिएको छ । दर्जनभन्दा बढी कविहरूले गीत, मुक्तक, गजल तथा कविता वाचन गरे । कार्यक्रममा प्रकृति राई, शारदा निरौला ‘सारु’ सूर्य तामाङ, रविन्द्र केदेम, सविता फागो, विमला श्रेष्ठ, वर्षा भण्डारी, दीपा मगराती, सूर्य बस्नेत, छविलाल चौधरी, लक्ष्मण कटुवाललगायतले रचना वाचन गरे ।
कार्यक्रममा अतिथि पर्यावरणीय कवि बिजय हितानले पनि कविता वाचन गरे । वाचित रचनामाथि बोल्दै वक्ता प्राध्यापक इन्दिरा महर्षीले स्वर्णिम साहित्य समाजको स्वर्णिम भविष्य देखेको बताइन् । उनले साना नानीहरूलाई स्थान दिनु भनेको भोलिको भविष्य निर्माण गर्नु रहेको बताइन् ।
