विराटनगर । सशस्त्र प्रहरीले भारतीय नम्बर प्लेटको स्कारपियोबाट ठुलो परिमाणमा गाँजा बरामद गरेको छ । आज बिहान २ बजे सशस्त्र प्रहरी बल मोरङले विराटनगर १ नोबेल डेरीबाट १ सय २० केजी गाँजा बरामद गरेको हो ।
जदाहामा मकै बारीमा भेटियो १४ बोरा गाँजा
सूचनाको आधारमा सशस्त्र प्रहरीले बुढीगंगा गाउँपालिका १ स्थित टंकीसिनुवारी चोकमा सशस्त्र प्रहरी निरीक्षक भूपेन्द्र काजी निरौलाको कमाण्डमा खटिएको ९ जनाको मोबाइल चेक प्वाइन्ट टोलीले चेकजाँच गरेको थियो । इटहरीबाट विराटनगरतर्फ आउँदै गरेको बिआर ११ भी ७६४५ नम्बरको सेतो कालो रङ्गको स्कारपियो गाडीलाई चेकजाँच गर्न खोज्दा स्कारपियो नरोकी विराटनगरतर्फ हुइँकिएको थियो ।
सशस्त्र प्रहरी निरीक्षक निरौलाको टोलीले स्कारपियोलाई पीछा गर्दै जाँदा विराटनगर १ स्थित नोबेल डेरी चोकमा स्कारपियो छाडी चालक फरार भएका थिए । चेकजाँचको क्रममा स्कारपियोबाट सशस्त्र प्रहरीले गाँजा बरामद गरेको सशस्त्र प्रहरी बल मोरङका निमित्त कार्यालय प्रमुख डिएसपी होमनाथ भट्टराईले बताए । बरामद गरेको गाँजा आवश्यक कारबाहीको लागि मोरङ प्रहरी बुझाएको छ ।
