विराटनगर । एभरेष्ट बैङ्क इटहरी शाखाबाट ३३ जना बचतर्कताहरूको रकम हिनामिना गर्ने मुख्य योजनाकार र बैङ्कका प्रबन्धकसहित १३ जनाविरुद्ध मुद्दा दायर गरिएको छ ।
जिल्ला सरकारी वकिलको कार्यालय सुनसरीले पक्राउ परेका ९ जना र फरार रहेका ४ जना गरी १३ जनालाई प्रतिवादी बनाएर उच्च अदालत विराटनगरमा शुक्रबार बैङ्किङ कसूरमा मुद्दा दर्ता गरेको हो । बचतकर्ताहरूले जम्मा गरेको १ करोड ५० लाख २३ हजार ४ सय ३४ रुपैयाँ बैङ्कका कर्मचारीको मिलेमतोमा हिनामिना भएको थियो । अभियोग दर्ता भएकोमध्ये ७ जना बैङ्कका कर्मचारी रहेका छन् भने अन्य ६ जना पैसा झिक्ने व्यक्ति रहेका छन् ।
यसरी बैङ्क घोटाला प्रकरणमा बैङ्कको उदयपुर शाखाका अपरेसन मेनेजर विराटनगर–८ का ३४ वर्षीय निरज प्रधान, बैङ्कको इटहरी शाखा प्रबन्धक सिन्धुपाल्चोक बाह्रबिसे–८ घर भएका ४२ वर्षीय विश्वराज शाक्य, बैङ्कको इटहरी शाखाका सुपरभाइजर ३७ वर्षीय धावा लामा, बैङ्कका कनिष्ठ सहायकहरू २७ वर्षीय मनोज घिमिरे, २७ वर्षीय देवराज शर्मा, २७ वर्षकै रन्जित पण्डित, बैङ्कको इटहरी शाखाकी टेलर ३० वर्षीया पवित्रा कटुवाललाई प्रतिवादी बनाएर अभियोग दर्ता भएको छ । बैङ्कको रकम अपचलन गर्ने गिरोहका मुख्य योजनाकार प्रधान रहेको प्रहरी अनुसन्धानबाट खुलेको छ ।
यस्तै धनुषाको मिथिला नगरपालिका–११ का ३४ वर्षीय शङ्कर भुजेल, भक्तपुरको सूर्यविनायक नगरपालिका–२ का २७ वर्षीय अजय खिउँजूलाई पनि प्रतिवादी बनाएको छ । पक्राउ पर्ने खिउँजू र भुजेल पैसा झिक्ने व्यक्ति हुन् ।
फरार प्रतिवादी बनाएर बाँके जिल्ला बैजनाथ गाउँपालिका–८ घर भई काठमाडौँ महानगरपालिका–७ का अर्जुन थारू, सप्तरीको सुरुङ्गा नगरपालिका–६ का जयकुमार साह, उर्लाबारी नगरपालिका–३ का अशोक थापा र अर्जुन महताराविरुद्ध मुद्दा दायर गरिएको जिल्ला सरकारी वकिलको कार्यालय सुनसरीका जिल्ला न्यायाधीवक्ता एकराज अधिकारीले जानकारी दिए ।
आइतबारदेखि उच्च अदालत विराटनगरको वाणिज्य इजलासमा प्रतिवादीको बयान सुरु हुने र त्यसपछि थुनछेक बहस सुरु हुने उच्च अदालत विराटनगरले जनाएको छ ।
सुनसरी प्रहरीले मेनेजर प्रधान पक्राउ परेपछि बैङ्कका अन्य सात जना कर्मचारीको पनि रकम अपचलनमा संलग्नता देखिएपछि पक्राउ गरिएको थियो । अनुसन्धानका क्रममा प्रहरीले यसअघि २०७९ चैत १२ गते एभरेष्ट बैङ्क गाईघाट शाखाका अपरेसन इन्चार्ज प्रधानलाई पक्राउ गरेको थियो । प्रधानमाथि केरकार गर्दा बैङ्कभित्रको सङ्गठित जालो पत्ता लागेको सुनसरी प्रहरीका डिएसपी राजकुमार राईले बताए ।
पाँच महिनाको अवधिमा ३३ जना ग्राहकको खाताबाट ५९ पटक कनेक्ट आईपीएस र नक्कली चेकबुक प्रयोग गरेर १ करोड ५० लाख २३ हजार ४ सय ३४ रुपैयाँ निकालिएको अनुसन्धानबाट खुलेको डिएसपी राईले बताए ।
‘यसरी रकम अपचलन गर्ने गिरोहका मुख्य नाइके एभरेष्ट बैङ्क उदयपुरका अपरेसन मेनेजर निरज प्रधान रहेको खुलेको छ’ डिएसपी राईले भने, ‘बैङ्कबाट अपचलन गरेको रकम अनलाइन जुवा, सट्टेबाजी खेल र मोजमस्तीमा उडाएको बयानको क्रममा बताएका छन् ।’
ग्राहकको कनेक्ट आईपीएसको आइडी पासवर्ड चोरी गरी र नक्कली चेक बनाएर रकम झिक्ने गिरोहका नाइके प्रधान इटहरीबाट पछि गाईघाट शाखाका अपरेसन इन्चार्ज भएर गएका थिए । उनी उदयपुर गएपछि पनि इटहरी शाखाबाट रकम अपचलन भएपछि थप कर्मचारी पक्राउ परेको प्रहरीले जनाएको छ ।
इटहरी शाखामा कार्यरत प्रधानको गत मार्च १२ तारिखमा गाईघाट सरुवा भएको थियो । उनको योजनामा गत १४ नोभेम्बर २०२२ देखि ३१ मार्च २०२३ सम्म पाँच महिनाको अवधिमा ५९ पटक कनेक्ट आईपीएसबाट एक करोड १४ लाख ७५ हजार २ सय ८४ रुपैयाँ निकालिएको छ ।
त्यस्तै नक्कली चेकमार्फत् ३५ लाख ४८ हजार १ सय ५० रुपैयाँ निकालिएको प्रहरीले बताएको छ ।
कर्मचारीले ३३ जना ग्राहकको खाताबाट अधिकतम् ७ लाखसम्म निकालेको देखिएको प्रहरीले बताएको छ । आफ्नो खाताबाट रकम हराएपछि ग्राहकले बैङ्कमा जानकारी गराएका थिए । त्यसपछि बैङ्कमा हल्लीखल्ली मच्चिएको थियो । बैङ्क स्वयम्ले प्रहरीलाई अनुसन्धान गर्न भनी निवेदन दिएको थियो ।
