विराटनगर । एभरेष्ट बैङ्क इटहरी शाखाबाट डेढ करोड बढी घोटाला प्रकरणमा पक्राउ परेका बैङ्कका प्रबन्धकसहित ९ जना आरोपीको बयान सुरु भएको छ । उच्च अदालत विराटनगरको वाणिज्य इजलासमा आइतबारदेखि बयान सुरु भएको हो ।
उच्च अदालतका न्यायाधीशद्वय कृष्णकमल अधिकारी र राजनप्रसाद भट्टराईको इजलासमा प्रतिवादीहरूको बयान सुरु भएको छ । बयान सकिएपछि थुनछेक बहस सुरु हुने उच्च अदालत विराटनगरले जनाएको छ ।
जिल्ला सरकारी वकिलको कार्यालय सुनसरीले पक्राउ परेका ९ जना र फरार रहेका ४ जनालाई प्रतिवादी बनाएर उच्च अदालत विराटनगरमा गत शुक्रवार बैंकिङ कसुरमा मुद्दा दर्ता गरेको थियो ।
यसमा ७ जना एभरेष्ट बैङ्कका कर्मचारी छन् भने अन्य ६ जना पैसा झिक्ने व्यक्ति रहेका छन् । बैंकका उदयपुरका अपरेसन मेनेजर विराटनगर–८ का ३४ वर्षीय प्रधान, इटहरी शाखा प्रबन्धक तथा सिन्धुपाल्चोक बाह्रबिसे–८ का ४२ वर्षीय विश्वराज शाक्य, बैङ्कको इटहरी शाखाका सुपरभाइजर ३७ वर्षीय धावा लामा, बैङ्कका कनिष्ठ सहायकहरू २७ वर्षीय मनोज घिमिरे, २७ वर्षीय देवराज शर्मा, २७ वर्षकै रञ्जित पण्डित, बैङ्कको इटहरी शाखाकी टेलर ३० वर्षीया पवित्रा कटुवाललाई प्रतिवादी बनाएर अभियोग दर्ता भएको छ ।
बैङ्कको रकम अपचलन गर्ने गिरोहका मुख्य योजनाकार प्रधान रहेको प्रहरी अनुसन्धानबाट खुलेको छ । यस्तै धनुषाको मिथिला नगरपालिका–११ का ३४ वर्षीय शङ्कर भुजेल, भक्तपुरको सूर्यविनायक नगरपालिका–२ का २७ वर्षीय अजय खिउँजूलाई पनि प्रतिवादी बनाइएको छ । पक्राउ परेका खिउँजू र भुजेल पैसा झिक्ने व्यक्ति हुन् । फरार प्रतिवादी बनाएर बाँकेको बैजनाथ गाउँपालिका–८ घर भई काठमाडौँ महानगरपालिका–७ का अर्जुन थारू, सप्तरीको सुरुङ्गा नगरपालिका–६ का जयकुमार साह, उर्लाबारी नगरपालिका–३ का अशोक थापा र अर्जुन महतारा उपर मुद्दा दायर गरिएको जिल्ला सरकारी वकिलको कार्यालय सुनसरीका जिल्ला महान्यायाधीवक्ता एकराज अधिकारीले जानकारी दिए ।
अनुसन्धानका क्रममा प्रहरीले यसअघि २०७९ चैत १२ गते एभरेष्ट बैङ्क गाईघाट शाखाका अपरेसन इन्चार्ज प्रधानलाई पक्राउ गरेको थियो । प्रधानमाथि केरकार गर्दा बैङ्कभित्रको सङ्गठित जालो पत्ता लागेको सुनसरी प्रहरीको डिएसपी राजकुमार राईले बताए । पाँच महिनाको अवधिमा ३३ जना ग्राहकको खाताबाट ५९ पटक कनेक्ट आइपिएस र नक्कली चेकबुक प्रयोग गरेर १ करोड ५० लाख २३ हजार ४ सय ३४ रुपैयाँ चोरी भएको अनुसन्धानबाट खुलेको प्रहरीको दाबी छ ।
तत्कालीन इटहरी शाखामा कार्यरत प्रधानको गत मार्च १२ तारिखमा गाईघाट सरुवा भएको थियो । उनको योजनामा गत १४ नोभेम्बर २०२२ देखि ३१ मार्च २०२३ सम्म पाँच महिनाको अवधिमा ५९ पटक कनेक्ट आईपीएसबाट एक करोड १४ लाख ७५ हजार २ सय ८४ रुपैयाँ निकालिएको छ । त्यस्तै नक्कली चेकमार्फत् ३५ लाख ४८ हजार १ सय ५० रुपैयाँ निकालिएको प्रहरीले बताएको छ । ३३ जना ग्राहकको खाताबाट अधिकतम् ७ लाखसम्म निकालिएको पाइएको प्रहरीले बताएको छ । आफ्नो खाताबाट रकम हराएपछि ग्राहकले बैङ्कमा जानकारी गराएका थिए । त्यसपछि बैङ्कले प्रहरीलाई अनुसन्धानका लागि निवेदन दिएको थियो ।
के भन्छन् आरोपी ?
केही समय पहिले इटहरीको एभरेष्ट बैङ्कको शाखा कार्यालयबाट पाँच महिनाको अवधिमा ३३ जना ग्राहकको खाताबाट १ करोड ५० लाख २३ हजार ४ सय ३४ रुपैयाँ चोरी भएको खुलासा भयो । अनुसन्धानका क्रममा ३ जना समातिए ।
प्रहरीलाई दिएको बयानमा पक्राउ परेका प्रधान, भुजेल र खिउँजू यी ३ जनाले फिफा वल्र्डकप २०२२ को क्रममा उक्त जुवाजन्य खेल खेल्ने गरेको र त्यही क्रममा एक–अर्काबीच चिनजान हुँदै रकम लेनदेन चलेको भनेका छन् । मुख्य आरोपी निरज प्रधान हाल एभरेष्ट बैङ्क उदयपुर शाखाका म्यानेजर हुन् । उनका अनुसार उनी एभरेष्ट बैङ्कको इटहरी शाखामा कार्यरत छँदा फिफा वल्र्डकप २०२२ सुरु भयो । सो क्रममा विश्वकपको विभिन्न खेल तथा गतिविधिहरूमा सट्टेबाजी गर्न प्रयोग हुने बेटिङ एप्लिकेसन वान एक्सबेटमार्फत् सट्टेबाजी खेल्ने उनलाई लत लाग्यो । उनले विभिन्न कम्पनीको शेयर बिक्री गरेर खेले ।
आफूसँग रहेको मौज्दात सकिँदै गएपछि उनले आफू कार्यरत बैङ्कका ग्राहकहरूको खाताबाट कनेक्ट आईपिएसको दुरुपयोग गरे । अनि एजेन्ट शङ्कर भुजेलले उपलब्ध गराएका विभिन्न व्यक्तिहरूको अन्य बैङ्कका विभिन्न खातामा रकमान्तर गरे ।
उनले आफू एक्लैले कनेक्ट आईपिएसको दुरुपयोग गरी ग्राहकहरूको खातामा रहेको मौज्दात रकमान्तर गर्न सम्भव नभएपछि आफूले मार्कर÷चेकर दुईवटा युजरको पासवर्ड कम्प्युटरमा अटो सेभ गरेर त्यो कार्य गरेको बयान दिएका छन् । साथै उनले आफूले कति रकम निकालेको भन्नेसम्म जानकारी नभएको बयान दिएका छन् । त्यसबेला बैङ्कका अन्य कर्मचारीले पनि सट्टेबाजी खेल्ने गरेको उल्लेख गरेका छन् ।
यस्तै प्रतिवादी शङ्कर भुजेलले काठमाडौँको कीर्तिपुर डेरा गरी बस्ने सञ्जय मोक्तान (लामा) मार्फत्अजय खिउँजूसँग चिनजान भएको बताएका छन् । उनका अनुसार कुराकानीका क्रममा १५ प्रतिशत कमिसन दिने प्रलोभनपछि निरज प्रधानसँग वान एक्सबिइटी खेल्ने क्रममै चिनजान भयो ।
भुजेलले खिउँजूसँग पैसा हाल्नको लागि बैङ्क एकाउन्ट मागेर निरज प्रधानलाई पठाइदिन्थे । निरज प्रधानले सो बैङ्क एकाउन्टमा अनलाइनमार्फत् रकमान्तर गरेको स्क्रिन सट भुजेललाई म्यासेन्जरमा पठाइदिएपछि सो म्यासेज उनले खिउँजूलाई पठाइदिने गरेका थिए ।
शङ्कर भुजेल यसमा आफू पनि पीडित भएको बताएका छन् । ‘निरज प्रधानले मेरो कृषि विकास बैङ्क, नेपाल इन्भेस्टमेन्ट बैङ्क, मेघा बैङ्क र माछापुच्छ«े बैङ्कमा आठ लाख पैंतालीस हजार चौबीस रुपैयाँ निकाली घर खर्च गरी खाई मासे’–उनले भनेका छन् ।
उता प्रतिवादी अजय खिउँजूले भने अवैध रकम क्यास बनाइदिने प्रलोभनमा पारी निरजहरूले खेल्न उक्साउने गरेको बयान दिएका छन् । उनका अनुसार विश्वमा सञ्चालन हुने विभिन्न खेल तथा गतिविधिहरूमा सट्टेबाजी गर्न प्रयोग हुने बेटिङ एप्लिकेसन वान एक्सबिइटीमा उनको पनि लत बसेको थियो । तर, खेल्ने क्रममा जितेको पैसा एजेन्टले मोबाइल क्यास निकालेर खाइदिन्थे । त्यसैले, आफैले वान एक्सबिइटीको वेबसाइट प्रयोग गरी एलिना रिटेलमार्फत् त्यसको एपमा रकम जम्मा गरी खेल्ने, जित्दा आफैले क्यास निकाल्न मिल्ने (मोबाइल क्यास) बनाई खेल्दै आएका थिए ।
खिउँजूका अनुसार शङ्कर भुजेल र सञ्जय मोक्तानले पार्टनरसिपमा पहिलेदेखि नै वान एक्सबिइटी एजेन्ट (मोबाइल क्यास) को काम गर्दै आएका थिए । दुवैबीच मनमुटाव भएपछि शङ्कर भुजेलले खिउँजूसँग मोबाइल क्यास बनाइदिन आग्रह गरे । उनले कुरा काट्न नसकेर आफ्नोमा भएको मौज्दात वान एक्सबिइटी खेल्ने व्यक्तिको गेमिङ एकाउन्टमा रकमान्तर गरिदिन्थे । यसबापत एलिना रिटेलबाट ५ प्रतिशत कमिसन पाउँथे । उनले जम्मा सत्र लाख पचासी हजार बत्तीस रुपैयाँ रकमान्तर गर्न लगाएको बताएका छन् ।
उक्त ठगी प्रकरणका अन्य आरोपीले भने इन्कारी बयान दिएका छन् । उनीहरूले एभरेष्ट बैङ्क उदयपुरका हालका म्यानेजर प्रधान नै यसको मुख्य दोषी रहेको उल्लेख गरेका छन् । त्यसबाट आफूहरूले कुनै लाभ नलिएको उनीहरूको जिकिर छ ।
