देउराली । विश्व रक्तदाता दिवसको अवसरमा धरान ५ स्थित फूलबारी एकता समाजले रक्तदान कार्यक्रमको आयोजना गरेको छ ।
हरेक वर्षको जुन १४ का दिन रक्तदान गर्न प्रेरित गर्ने उद्देश्यले मनाइने विश्व रक्तदाता दिवसको अवसर पारेर समाजले रक्तदान कार्यक्रमको आयोजना गरेको हो ।
धरान ५ स्थित तल्लो देउराली चोकमा आयोजना गरिएको रक्तदान कार्यक्रममा संस्थाका सदस्यलगायत उपस्थित एक सय एक जनाले रक्तदान गरेको संस्थामा अध्यक्ष कविचन्द्र याक्खाले जानकारी दिएका छन् ।
उनले, समाजमा मानवीय भावनाको विकास गर्न तथा रक्तदानको आवश्यकताबारे चेतना दिनुका साथै विश्वभरका रक्तदातालाई धन्यवाद दिन पनि कार्याक्रमको आयोजना गरिएको बताए । रक्तदानमा सहभागी रक्तदातालाई प्रमाण पत्र वितरण गरिएको थियो ।
रक्तदान कार्यक्रमका लागि संस्थाका सदस्य तथा विभिन्न व्यक्तिहरूले आर्थिक तथा जिन्सी सहयोग गरेका थिए । अध्यक्ष याक्खाका अनुसार ८५ हजार आर्थिक सहयोग जुटेकोमा खर्च कटाए ४६ हजार ५ सय बचत भएको छ ।
धरान उपमहानगरपालिकाका उपप्रमुख आइन्द्र विक्रम बेघाको प्रमुख आतिथ्यतामा सम्पन्न रक्तदान कार्यक्रमको विशेष अतिथि ५ नम्बर वडाका वडाध्यक्ष मन प्रसाद लिम्बू रहेका थिए । त्यस्तै अतिथिहरूमा वडा सदस्य, सुनिता राई प्रेम दाहाल, शान्तिमाया विश्वकर्मा र देउराली अस्थायी प्रहरी चौकीका प्रमुख हवलदार फत्तेमान लामा रहेको याक्खाले बताए ।
