विजयपुर । धरान–६ स्थित सरस्वती माविले माध्यमिक शिक्षा परीक्षा (एसईई) उत्कृष्ट हुने विद्यार्थीलाई पुरस्कृत गरेको छ ।
आइतबार विद्यालयले एसईई उत्तीर्ण विद्यार्थीलाई शुभकामना तथा बधाई कार्यक्रम आयोजना उत्कृष्ट नतिजा ल्याउने चार विद्यार्थीलाई पुरस्कृत गरेको हो । विद्यालयका प्रधानाध्यापक गङ्गा धमलाले उत्कृष्ट नतिजा ल्याउने विद्यार्थीलाई व्यक्तिगत रूपमा पुरस्कृत गरेका हुन् ।
सरस्वती माविबाट एसईई परीक्षामा ३.६ जिपिए ल्याउने दिवस खरेललाई ३ हजार रुपैयाँले पुरस्कृत गरेका हुन् । विपन गुरुङले ३.५४ जिपिए, युनिक सुवेदी ३.३ जिपिए र कुमोद लामिछानेले ३.२ जिपिए ल्याएका छन् । उनीहरूलाई प्रधानाध्यापक धमलाले जनही २ हजार रुपैयाँका दरले परस्कृति गरेका हुन् । विद्यालयका शिक्षक मानबहादुर पौडेलले आफ्नो विषयमा उत्कृष्ट नतिजा ल्याउने विद्यार्थी खरेललाई १ हजार रुपैयाँ पुरस्कार दिएका छन् ।
विद्यालय व्यवस्थापन समितिका सदस्य हरिकृष्ण अधिकारीको अध्यक्षमा सम्पन्न कार्यक्रममा धरान–६ का वडाध्यक्ष भूपेन्द्र भट्टराईले मानिसका लागि शिक्षा नै पहिलो खुड्किलो भएको बताए । उनले आर्थिक अभावले वडाका कसैलाई शिक्षाबाट बञ्चित हुन नदिने बताए । उनले विद्यालयमा विज्ञान प्रयोगशाला निर्माणमा पनि सहयोग गर्ने बताए । कार्यक्रममा शिक्षक, अभिभावक तथा विद्यार्थीले धारणा राखेका थिए ।
