आज तिथिले श्रावण कृष्ण अष्टमी । साउन महिनाभर रुद्राक्ष्यरण्य भगवान श्री पिण्डेश्वर महादेवको पूजा, अर्चना, ध्यान तप गरे पूण्यार्जन हुने धार्मिक विश्वास छ । तिथिले श्रावण महिना सुरु भएपछि पहिलो सोमबार भक्तजनहरु पिण्डेश्वर महादेवलाई जल चढाउन विजयपुरस्थित बाबाधाम पुगेका छन् । विश्वासअनुसार यस वर्षको बोलबम पदयात्रा सुरु भएको छ ।
चतरास्थित सप्तकोशीको जल ल्याई पिण्डेश्वर महादेवलाई अर्पण गर्ने धार्मिक परम्परा रहिआएको छ । भक्तजनहरु वराहक्षेत्रस्थित कोका–कौशिकी संगम स्थल, प्राचीन हरिद्वार चतरा धामबाट सप्तकोशी नदीको पवित्र जल उठाई महादेवको संकल्प गरी ‘बोलबम– बोलबम’ भन्दै पैदल हिंडेर पिण्डेश्वर महादेवलाई १ सय ८ बेलपत्र, धतुरोसहित अर्पण गर्ने गर्दछन् ।
धार्मिक मान्यताअनुसार साउन महिना महादेवको प्रिय महिना हो । यो महिनामा महादेवको पूजा अर्जना र प्रियवस्तु अर्पण गरे मनोवाञ्छित फल प्राप्त हुने विश्वास छ ।
तिथिले साउन भेटेपछि भक्तजनहरु बोलबम आउन थालेको पिण्डेश्वर बाबाधाम समितिका अध्यक्ष विकास बनेपालीले बताए । भगवान् शिवको आँसु खसेर रुद्राक्ष्य उत्पन्न भएको र सोही क्षेत्र रुद्राक्ष्यरण्य महादेवका रुपमा स्थापित भएको पौराणिक विश्वास छ । हिन्दू धार्मिक शास्त्रहरुमा पिण्डेश्वर महादेवलाई रुद्राक्षरण्य महादेवका रुपमा व्याख्या गरिएको छ ।
चन्द्रमासअनुसार पहिलो साउने सोमबार आज परेको छ । आजबाट सोमबारे व्रत शुरु भएको छ । सौर्यमासअनुसार यस वर्ष साउन महिनामा अधिकमास परेकाले आजबाट नै व्रत शुरु भएको हो । चन्द्रमासअनुसार दुईवटा सोमबारपछि अधिकमास शुरु हुन्छ ।
