विराटनगर । कोशी प्रदेशका मुख्यमन्त्री उद्धव थापाले पद तथा गोपनीयताको शपथ लिएका छन् । बुधबार साँझ प्रदेश प्रमुखको कार्यालयमा प्रदेश प्रमुख परशुराम खापुङले शपथ गराएका हुन् ।
आज बिहान १० बजे लिने भनिएको शपथ ग्रहण भागबन्डा मिलाउन ढिलो हुँदा थापाले साँझ साढे ५ बजेका लागि सरेको थियो । माओवादीका केन्द्रका बाबुराम गौतमलाई सभामुखबाट राजिनामा गराए मुख्यमन्त्री बनेका थापाले शपथ लिएसँगै गौतम सहित तीन जनालाई मन्त्री नियुक्त गरेका छन् ।
आर्थिक मामिला तथा योजना मन्त्री नियुक्त भएका गौतमसहित भौतिक पूर्वाधार विकासमा नेकपा एकीकृत समाजवादीका कमल जबेगु र खानेपानी, सिँचाइ तथा ऊर्जा मन्त्रीमा काँग्रेसका प्रदीपकुमार सुनुवार नियुक्त भएका छन् । उनीहरूले पनि पद तथा गोपनीयताको शपथ लिएका छन् ।
जबेगु र सुनुवार असार २१ गते मुख्यमन्त्री बन्दा पनि थापाले मन्त्रीमा नियुक्त गरेका थिए । तर, उनीहरूले मन्त्रालयको जिम्मा नपाई सर्वोच्चको आदेशमा पदमुक्त भएका थिए ।
प्रदेश प्रमुख पर्शुराम खापुङले संविधानको १६८ को उपधारा २ अनुसार काँग्रेस, माओवादी केन्द्र, एकीकृत समाजवादी र जसपाको समर्थन पाएका थापालाई मङ्गलबार मुख्यमन्त्री नियुक्त गरेका थिए। थापालाई मुख्यमन्त्री बनाउन काँग्रेसका २९, माओवादीका १३, एकीकृत समाजवादीका ४ र जसपाका १ सांसदको समर्थन रहेको छ ।
यसअघि २१ असारमा मुख्यमन्त्री नियुक्त भएका थापाले सभामुखको समेत समर्थन लिएर मुख्यमन्त्री बन्नु संविधान विपरीत भन्दै सर्वोच्चले उनको नियुक्ति बदर गरिदिएको थियो ।
