इक्वेडरको आसन्न राष्ट्रपतीय निर्वाचनका उमेदवार फर्नान्डो भिल्लाभिसेन्सियोको हत्या गरिएको छ । चुनावी र्यालीका क्रममा गोली हानी हत्या गरिएको हो ।
देशको राष्ट्रियसभाका सदस्यसमेत रहेका भिल्लाभिसेन्सियोमाथि बुधबार उत्तरी सहर क्विटोमा कार्यक्रमबाट बाहिरिने क्रममा आक्रमण गरिएको थियो ।
भिल्लाभिसेन्सियो कारमा बसेर जान लागेका बेला एक व्यक्तिले उनको टाउकामा गोली हालेको सो चुनावी अभियान टोलीका एक सदस्यले स्थानीय सञ्चारमाध्यमलाई बताएको बीबीसीले उल्लेख गरेको छ ।
५९ वर्षीय भिल्लाभिसेन्सियोमाथि तीन गोली प्रहार गरिएको प्रत्यक्षदर्शीले बताएका छन् ।
सुरक्षाकर्मीको जवाफी कारबाहीमा ती आक्रमणकारीमाथि पनि गोली प्रहार गरिएको थियो । पछि उनको मृत्यु भएको त्यहाँका महान्यायाधिवक्ताले जनाएका छन् ।
त्यहाँ राष्ट्रपतिको पहिलो चरणको निर्वाचन आउँदो अगस्ट २० मा हुँदैछ ।
