धनकुटा । धनकुटाको मुढेबास प्रहरी चौकीमा कार्यरत असइ प्रकाश चौधरी मृत फेला परेका छन् । मङ्गलबार बिहान कोठामा घोप्टो परिरहेको अवस्थामा ४१ वर्षीय चौधरी मृत भेटिएका हुन् ।
उच्च रक्तचापका कारण असइ चौधरीको मृत्यु भएको हुनसक्ने अनुमान गरिएको धनकुटाका प्रहरी प्रवक्ता डिएसपी राजबाबु महर्जनले जानकारी दिए ।
एक दिन अघिदेखि नै समस्या भयो भनेर ड्युटी पनि गर्न नसकेको र मङ्गलबार बिहान कोठामा हेर्न जाँदा उनी सुत्ने कोठामा चौधरी मृत भेटिएको डिएसपी महर्जनले बताए ।
मृतकको शवलाई पोष्टमार्टमको लागि मङ्गलबार नै धरानस्थित बीपी कोइराला स्वास्थ्य विज्ञान प्रतिष्ठान पठाइएको डिएसपी महर्जनले बताए । मोरङ घर भएका चौधरी मुढेबास प्रहरी चौकीमा इन्चार्जको रूपमा कार्यरत थिए ।
