दसैं । घर जाने चटारो । गाडी पाउनै मुस्किल । देशभित्रकै परदेशी वा देशबाहिरको परदेश । दसैं आउन लागेपछि दिनगन्ती सुरु हुन्छ । अगाडिअगाडि नै टिकट कसरी पाउने होला भन्ने पिर बढ्छ । दशमीको पाँचौं दिन आज धरानबाट पूर्वी पहाड जाने बसहरु एकाबिहानै छुटेका छन् । धनकुटा, भोजपुर, खोटाङ, तेह्रथुम, संखुवासभा, ताप्लेजुङका मान्छे बिहानै बसको टिकट काटेर कतिबेला बस छुट्ला भनेर कुरेर बसेका छन् ।
किन हो, दसैंको उत्साहमा ह्रास आउँदैछ । महामारी, आर्थिक मन्दीले पनि होला कोही उत्साहित छैनन् । व्यापारी, उद्योगी, मजदुरमा निराशा छाएको छ । त्यस्तै निराशा यातायात मजदुर र व्यवसायीमा छ ।
साविकमा धरानबाट दसैंको सिजनमा पहाड जाने ६० वटा बस छुट्थे । अनि, सय–डेढसय साना सवारी । अहिले मुस्किलले २५ वटा बस धरानको भानुचोकबाट छुट्छन् । आजमात्रै हिजोअस्तिका तुलनामा केही सवारी बढी छुटे । भानुचोक बस काउन्टरका इञ्चार्ज जनक लिम्बू भन्छन्, ‘पालो काट्दै बस्नुपरेको छ ।’
पहाड जाने यात्री धरान झर्न छाडे । बाइपास भयो धरान । पहाड जाने ट्रान्जिट रहेन धरान । साविकमा काठमाडौं, विराटनगर, इटहरी, काँकडभिट्टा र पश्चिमका शहरबाट यात्रीले धरान झर्नुपथ्र्यो । धरानबाट बस समातेर पहाड चढ्नुपथ्र्यो । तर अहिले पूर्वका विभिन्न शहर र राजधानीबाट सिधै पहाडतिर सवारी चल्छ ।
विराटनगर, इटहरी हुँदै पूर्वबाट २५ बढी बस सिधा पहाडतिर हुँइकिन्छन् । काठमाडौंबाट भोजपुर, खाँदबारी र तेह्रथुम ठूला बस चल्छन् । अहिले धरानले मन्दी खेप्नु परेको छ । यातायात व्यवसायमा ह्रास आयो । सानाठूला व्यापारीको कारोबार सुक्यो ।
आज दसैंको पाँचौं दिनमा भानुचोकबाट बस छुट्यो ।
तस्बिरहरुमा हेर्नुहोस्ः
