इनरुवा । सुनसरीको इनरुवाबाट दुई करोड मूल्य बराबरको नेपाली नक्कली नोटसहित पक्राउ परेका व्यक्तिलाई प्रहरीले सार्वजनिक गरेको छ ।
सुनसरी खोला पुल नजिकबाट भारत विहारका २२ वर्षीय महम्मद शैयाद साफी १ करोड ८२ लाख एकाउन्न हजार रकमसहित पक्राउ परेका थिए ।
पश्चिमबाट पूर्वतर्फ आउँदै गरेको बीआर ११ एक्स ३४२९ नम्बरको स्कारपियो गाडी चेकजाँचका क्रममा एक हजार दरका १८ हजार २ सय ५१ थान नक्कली नोट बरामद भएको सुनसरी प्रहरीले जनाएको छ । घटनाबारे पत्रकार सम्मेलन गरी जानकारी दिएको सुनसरी प्रहरीले नक्कली नोटको कारोबारमा गिरोहकै संलग्नता रहेको हुन सक्ने आशङ्का जनाएको छ ।
इटहरीबाट समेत प्रहरीले यसअघि ठूलो परिमाणको नक्कली नोट बरामद गरेको र पुनः सोही प्रकृतिसँग मिल्दो घटनाक्रम दोहोरिएकाले कारोबारी समूहमा गिरोहकै संलग्नता हुनसक्ने एसपी विपिन रेग्मीको भनाइ छ ।
पत्रकार सम्मेलनमा दिइएको जानकारीअनुसार नक्कली नोटसहित पक्राउ परेका भारतीय नागरिक स्कारपियो चालक हुन् । प्रहरीसहितको चेकिङ देखेर स्कारपियोमा सवार अर्का व्यक्ति भने फरार भएको प्रहरीको भनाइ छ । फरार व्यक्तिको खोजी भैरहेको जनाएको प्रहरीले नक्कली नोट कहाँबाट ल्याइएको भन्ने बारेको विषय भने अनुसन्धानकै क्रममा रहेको डिएसपी नवीनकृष्ण भण्डारीले बताए ।
नक्कली नोटको ओसार–पसारमा प्रयोग भएको गाडी र सवारी चालक भारतीय भएकाले कारोबारीको संलग्नता सीमापारिबाट समेत हुनसक्ने विषयलाई भने नकार्न नसकिने प्रहरीको भनाइ छ ।
बरामद नक्कली नोट पुराना तथा नयाँ भण्डारणपश्चात् ब्यागमा हालेर गन्तव्यमा पु¥याउन खोजिएको प्रहरीको अनुमान छ । प्रहरीले उक्त नक्कली नोट इटहरीको बजारमा लैजान खोजेको प्रारम्भिक अनुसन्धानमा देखिएको जनाएको छ । पक्राउ परेका व्यक्तिको हकमा म्याद थप गरी थप अनुसन्धानको प्रक्रिया जारी रहेको सुनसरी प्रहरीले जनाएको छ ।
