पर्यावरण संरक्षण गर्न मेची-महाकाली पैदलयात्रा सुरु

यात्रीमा सुवास सुवेदी, हरि न्यौपाने, पदम भण्डारी, दिनेश भण्डारी र उमेशकुमार राई रहनुभएको छ।मेची नदीको पानी बोकेर सुरु गरिएको पैदलयात्रा ६० दिनपछि महाकाली पुगेर यात्रा समापन हुने पैदलयात्री सुवासले जानकारी दिएका छन्।

उनले यात्राका क्रममा मुख्य राजमार्ग आसपासका ५० बढी सहरमा जनप्रतिनिधि, विभिन्न समुदाय, विद्यार्थी, सामाजिक व्यक्तित्व र राजनीतिक व्यक्तित्वसँग पर्यावरण संरक्षणका बारेमा छलफलसहित सुझाव सङ्कलन गर्ने बताए।

‘प्रतिव्यक्ति आठ बिरुवा रोपौँ, प्रकृति संरक्षणमा योगदान  पुर्‍याउने भन्ने नारासहित सुरु गरिएको यात्राका क्रममा १२ हजारभन्दा बढी व्यक्तिसँग छलफल गर्ने र हजारभन्दा बढी स्वयंसेवक तयार गर्ने अभियानको मुख्य उद्देश्य रहेको उनले राससलाई जानकारी दिएका छन्।

उनले यात्राका क्रममा स्थानीयस्तरमा पर्यावरण संरक्षणका निम्ति भइरहेका प्रयासका बारेमा खोजी गरी वृत्तचित्र निर्माण गर्ने, नवीकरणीय ऊर्जा, फोहरमैला व्यवस्थापन र अन्य पर्यावरणीय समस्या समाधानका बारेमा कार्यशालाको आयोजना गरिने बताए।

यात्राका क्रममा प्राप्त उपलब्धि र दस्तावेजलाई राष्ट्रपति र प्रधानमन्त्रीलाई हस्तान्तरण गरेर पर्यावरण संरक्षणका निम्नि सहयोग गर्ने यात्रु दिनेशले बताए ।