धरान : संविधानमा स्थानीय तहमा प्रमुख र उपप्रमुखमध्ये एक जना अनिवार्य महिला हुनुपर्ने व्यवस्था रहे पनि गठबन्धनका नाममा देशका धेरै ठाउँमा पुरुषहरूले दुवै पद ओगटेका छन् । आउँदो २०८४ सालको चुनावमा भने यस्तो अवस्था हुन नदिन अर्थात् नेतृत्वमा महिलालाई पु¥याउन अभियान सञ्चालन भइरहेको छ । शुक्रबार धरानमा पनि ‘महिला नेतृत्व, मिसन–८४’ नारासहित ¥याली र कोणसभा गरिएको छ ।
संविधानले ग्यारेन्टी गरेको महिला, दलित, जनजाति तथा सीमान्तकृतलाई समान अधिकार कार्यान्वयनका लागि अभियान सञ्चालन गर्दै आएको अन्तरपुस्ता महिलावादी मञ्चले धरान महिला सञ्जाल र विभिन्न महिला समूहसँग सहकार्य गरेर ¥याली प्रदर्शन गरेको हो । मञ्चले देशव्यापीरूपमा ‘अनुपम अभियान’ का नाममा यो अभियान सञ्चालन गरिरहेको छ । शुक्रबार धरान उपमहानगरपालिका कार्यालयअगाडिबाट छाताचोक, पुरानो बजार, देशीलाइन हुँदै भानुचोक पुगेको पञ्चेबाजासहितको महिलाहरूको ¥यालीले लोकतान्त्रिक चौतारीमा कोणसभा गरेको थियो ।
कोणसभामा बोल्दै अन्तरपुस्ता महिलावादी मञ्चकी संयोजक सरु जोशीले निर्वाचनका बेला दलहरूले गठबन्धनका नाममा महिलाहरूलाई पछि पारेर पुरुषहरू हाबी भएको भन्दै अब यस्तो हुन नदिन खबरदारीका लागि अभियान सञ्चालन गरेको बताइन् । देशका ३३ जिल्लामा अभियान सञ्चालन भएको बताउँदै उनले भनिन्, ‘महिलाहरू दल, जाति, सम्पन्नतामा विभाजित हुँदा हामी झन् कमजोर हुन्छौं । हामी एकजुट हुनु आवश्यक छ । यो अभियान त्यसैका लागि हो ।’
धरान उपमहानगरपालिकाका निवर्तमान उपप्रमुख मञ्जु भण्डारी सुवेदीले संविधानले प्रदान गरेको हक प्राप्त हुनुपर्ने बताइन् । लडेर ल्याएको व्यवस्थामा महिलाहरूले पनि कानूनले दिएको अधिकार उपभोग गर्न पाउनु पर्ने बताउँदै उनले भनिन्, ‘पहिला विभिन्न नाममा विभाजित भए पनि अब एकजुट भएर मेचीदेखि महाकालीसम्मका महिला एकजुट हुनुपर्छ । हामी एकजुट नहुँदा हामी पछि परेका छौं ।’
उनले सत्तामा महिला हुँदा मात्र महिलाले आफ्ना समस्या र विषयवस्तु खुलेर व्यक्त गर्नसक्ने आफ्नो अनुभव रहेको बताइन् । उनले धरानमा पनि नगर प्रमुख र उपप्रमुख दुवै पुरुष रहेको बताउँदै यो संविधानको मर्मविपरीत भएको उदाहरण दिइन् ।
त्यस्तै राष्ट्रिय स्वतन्त्र पार्टीकी नेता सरिन तामाङले पनि सबै महिला एकजुट हुनुपर्नेमा जोड दिइन् । उनले पार्टीले टिकट दिएर मात्र नहुने भन्दै महिलाहरूले आफ्नो क्षमता पनि वृद्धि गर्नुपर्ने बताइन् । महिला सञ्जाल र विभिन्न महिला सङ्गठनहरू सहभागी थिए । अन्तरपुस्ता महिलावादी मञ्चले २०८० देखि २०८४ सम्मका लागि देशव्यापी महिलावादी अनुपम अभियान सञ्चालन गरिरहेको छ । यसको मुख्य उद्देश्य महिलालाई नेतृत्वमा पु¥याउनु हो ।
